मुंराय माखौ बुंङो

मुंराय माखौ बुंङो:

खुलुमबाय लोगोफोर नोंथांमोनखौ जोंनि career guide in bodo ब्लागआव बरायनाय जाबाय। दिनैनि आरटिकलाव जों सावरायगोन मुंराय माखौ बुंङो, मुंराया मोनबैसे रोखोमनि आरो मा मा।

मुंरायनि सोमोन्दै सावरायनाय:

जाय सोदोबखौ मुं एबा मुंमानि थाखाय बेनि जायगायाव फज'नाय जायो बेखौनो मुंराय बुंनाय जायो।
थब्लाया सानफ्रोमबो फरायसालियाव थांङो।थब्लाया फरायसालियावबो मोजां फरायसा होननानै मुं दंङ। फोरोंगिरिफ्राबो थब्लाखौ इनायनो अनो।नाथाय 'थब्लाया' बे मुंखौ खनले खनले मुंख'नाय जादों।नाथाय 'थब्लाया' बे मुंखौ खेबफ्रोमबो मुंखवालाबानो जों एरैबादि बुंनो हागौ थब्लाया सानफ्रोमबो फरायसालियाव थांङो।फोरोंगिरिफ्राबो बिखौ इनायनो अनो।बिब्दि बुंब्ला बाथ्राखौ खोनासंनोबो मोजां जायो।बेवहाय खेबसेल' 'थब्लाया' बे मुंमाखौ बुंनानै 'बि' बे सोदोबमाजों थब्लाखौ बुंथिनानै होनाय जादों।बेनिखायनो 'बि' सोदोबमाया 'थब्ला' मुंनि जायगायाव ज'नायखाय बेयो मुंराय।
मुंरायखौ गासै मोनब्रै गुबै बाहागोआव राननाय जायो।जेरै-

1. सुबुं दिन्थिग्रा मुंराय
2. थावनि दिन्थिग्रा मुंराय
3. थाइलालि दिन्थिग्रा मुंराय आरो
4. बिदिन्था दिन्थिग्रा मुंराय

बे मोनब्रै मुंरायनि अनगायै बे मोनब्रै गुबै मुंरायखौनो बोखाउबावनानै गाहाइयाव होनाय मुंरायफोरखौ दिन्थिबावनाय जादों।जेरै-

1. थांखि दिन्थिग्रा मुंराय
2. सोंनाय दिन्थिग्रा मुंराय आरो
3. गाव दिन्थिग्रा मुंराय

सुबुं दिन्थिग्रा मुंराय: मानसि,जिब-जिरातफोरनि मुंनि जायगायाव जाय मुंरायफ्रा ज'यो बेफोरखौनो सुबुं दिन्थिग्रा मुंराय बुंनाय जायो।जेरै- आं,नों,बे,बि,बिथां,बिसोर,सोरबा बाइदि बाइदि।

थावनि दिन्थिग्रा मुंराय: जाय मुंराया थावनि एबा जायगानि मुंनि थाखाय ज'यो बेनो थावनि दिन्थिग्रा मुंराय।जेरै- बैयाव,जेराव,बहाय,बबेहाय बाइदि बाइदि।
थाइलालि दिन्थिग्रा मुंराय: जाय मुंराया थाइलालि बादि बाहायजायो बेफोर मुंरायखौनो थाइलालि दिन्थिग्रा मुंराय बुंनाय जायो।जेरै- बैयो,बेयो,जेरै,एरै,माब्रै,जाय,बेसे बाइदि बाइदि।

बिदिन्थि दिन्थिग्रा मुंराय: बिदिन्था एबा बोथोरनि मुंनि बदलै जाय मुंराय ज'यो बेखौनो बिदिन्था दिन्थिग्रा मुंराय बुंङो।जेरै- जेब्ला,माब्ला,मैया,गाबोन,दिनै,देनां बाइदि बाइदि।

थांखि दिन्थिग्रा मुंराय:जाय मुंरायजों सोरखौबा एबा माखौबा थांखि लानानै बुंनाय जायो।बेखौनो थांखि दिन्थिग्रा मुंराय बुंनाय जायो।जेरै- बै,बे,बिथां बाइदि बाइदि।

सोमोन्दो दिन्थिग्रा मुंराय: जाय मुंराय बाथ्रा एबा खौरांनि सोमोन्दो दिन्थिनानै होयो बेखौनो सोमोन्दो दिन्थिग्रा मुंराय बुंनाय जायो।जेरै- बिब्दि मानसि गैया जाय अराय दिन थांनानै थायो।बे बाथ्रा मोननैयाव 'जाय' बे मुंराया सोमोन्दो दिन्थिग्रा।मानोना जाय सोदोबमाया थायामोनब्ला बिब्दि मानसि गैया आरो अराय दिन थांनानै थानो; बे फंनै बाथ्रानि सोदोबथिया गेवसारा।'जाय' सोदोबमा थायाब्ला बाथ्रा फंनैखौबो दाजाबनो हाया।बेबादिनो -जेरै एबा, जामबा,बिब्दि बेफोर गासिबो सोमोन्दो दिन्थिग्रा मुंराय।

सोंनाय दिन्थिग्रा मुंराय: जाय मुंराया सोंनाय जायो एबा जाय मुंरायखौ सोंनाय हाबायाव बाहायनाय जायो बेखौनो सोंनाय दिन्थिग्रा मुंराय बुंनाय जायो।जेरै- सोर,मा,बबे,माखौ,माब्ला बाइदि बाइदि।

गाव दिन्थिग्रा मुंराय: जाय मुंरायजों गावखौ थारै दिन्थिनानै बुंनाय जायो बेखौनो गाव दिन्थिग्रा मुंराय बुंङो।जेरै- आं गावनो बे हाबाखौ मावदों।बिथांङा गावनो बेवहाय फैबाय।राजाया गावनि आखाइजोंनो रां होदोंमोन।गावनो गावखौ बुथारब्ला सोर लाखिनो हानो।

थांखि गैयै मुंराय: जाय मुंरायजों रावखौबो थारै एबा थांखि लानानै बुंनाय जाया बेखौनो थांखि गैयै मुंराय बुंनाय जायो।जेरै- सोरबा, माबा,बबेबा,सोर बाइदि बाइदि।

जुथुम दिन्थिग्रा मुंराय: जाय मुंराया गोबां, बयखौबो एबा जुथुम दिन्थियो बेखौनो जुथुम दिन्थिग्रा मुंराय बुंनाय जायो।जेरै- बयबो,गासिबो,दंनायमानि,दुलाराय,बेफोरबादि।

Read More......

सोदोबमा माखौ बुंङो?